संवादकीय

नमस्कार मित्र मैत्रिणींनो,

तुम्ही सर्व कसे आहात? आम्ही इकडे मजेत आहोत.

महाराष्ट्रात समाधानकारक नसला तरी थोड्या फार प्रमाणात का होईना सगळीकडे पाऊस पडत आहे. त्यामुळे वातावरण कसं हिरवं-हिरवं झालं आहे! सगळीकडे पसरलेली हिरवळ मनाला ताजं-तवानं करते. सगळीकडे काळ्या शेतातून चिमुकली चिमुकली हिरवी पाती डोकावताना दिसतायेत. शेतकरी शेतातील मशागतीच्या कामात मग्न झालेले दिसतायेत. आभाळातले काळे ढग फक्त पाण्याचीच नाही तर त्यासोबत आनंदाची आणि उत्साहाची देखील बरसात करतायेत असं वाटतं. सगळीकडे लगबग आणि उत्साहाचे वातावरण आहे.

आमची सुद्धा लगबग सुरु आहे बरं! काय म्हणता कशासाठी ??? तर ज्या संघांना आम्ही अजूनपर्यंत भेट देऊ शकलेलो नाही त्या संघाना भेट देण्यासाठीच आमची लगबग सुरु आहे. या वर्षी संघांची संख्या बरीच वाढल्याने सर्व संघाना भेट देणं अजून शक्य नाही झालेलं नाही आणि त्यासाठीच आमची बरीच फिरफिर सुरु आहे. तुम्ही देखील शाळा, अभ्यास, खेळ यात बरेच बिझी (व्यस्त) झाला असाल, नाही?

अशा व्यस्त वेळापत्रकात बरेचदा आपल्या आजू बाजूला काय घडतंय याची माहिती घ्यायला आपल्याला वेळच नसतो. तर काय असं सुरु आहे बरं आपल्या आजू बाजूला. राईनपाडा नावाच्या एका लहानशा गावात काय घडलं? सगळ्या गावाने मिळून पाच अनोळखी लोकांना इतकं मारलं की त्यांचे जीव गेले. ते लोक कोण आहेत हे देखील त्यांना विचारलं नाही की ते कशासाठी आले ते देखील विचारलं नाही. का मारलं असेल बर लोकांनी त्या पाच जणांना? तर ‘मुलं पळवणारी टोळी आली आहे’ या अफवेमुळे. या एका अफवेमुळे मागील दोन महिन्यांत भारत भरात जवळपास २० पेक्षा अधिक लोकांचा जीव गेलाय आणि दुर्दैव म्हणजे त्यातील सगळ्यात जास्त लोक महाराष्ट्रात मारल्या गेलेत. ज्या अनोळखी व्यक्तीला आपण मरेपर्यंत मारत असतो तो कोण आहे? कुठून आला आहे ? त्याचा गुन्हा काय ? आणि असलाच गुन्हा तर त्याला शिक्षा देणारे आपण कोण ? मरेपर्यंत मारणे ही कुठली शिक्षा ? याचा आपण आत्ताच विचार करून ठेवायला हवा. म्हणजे पुढे आपल्या समोर अशी घटना घडत असताना आपण कसे वागणार हे आपल्याला ठरवता येईल.

गर्दीचे शहाणपण असा एक शब्द प्रयोग आहे. त्याचा थोडक्यात अर्थ, अनेक सामान्य लोक मिळून जेव्हा एक समस्या सोडवतात तेव्हा ते एका विद्वान व्यक्तीपेक्षा अधिक सरस उपाय शोधू शकतात असा होतो. पण मागच्या काही महिन्यांमधील या आणि अशा काही घटना बघून गर्दीला खरच शहाणपण असतं का हा प्रश्न निर्माण झालाय.

आपल्याला या गर्दीचा भाग व्हायचंय का? याचा मात्र पक्का विचार आपल्याला आत्ताच करून ठेवायला हवा. गर्दीत असताना ऐनवेळी आपण कदाचित चुकीचा निर्णय घेऊ याची भीती वाटते!

भरारी वाचून तुमच्या प्रतिक्रिया आमच्या पर्यंत नक्की पोहचवा. तुम्हाला काय आवडलं काय आवडलं नाही हे देखील बिनदिक्कत कळवा.

तुमचे

प्रणाली, शैलेश

संवादकीय

हेल्लो मित्र-मैत्रिणींनो,

आम्ही आशा करतो की तुम्ही सर्व मजेत असाल. आम्हीही इकडे मजेत आहोत. दरवर्षीपेक्षा यावर्षीच्या उन्हाळ्याने जरा जास्तच जोर धरला होता. दुपारी बाहेर पडायची सोय देखील उरली नव्हती. दरवर्षी असा वाढत जाणारा उन्हाळा बघुन जाणवतं की हळू हळू का होईना पण पर्यावरण किती बिघडत चाललंय आणि पर्यायाने पृथ्वीला हे किती हानिकारक ठरत असेल! पण अशावेळी दुसऱ्या बाजूला कुमार निर्माणमधील तुम्ही मुलं झाडं लावतात, त्यांना जगवतात, कुठेही कचरा फेकत नाहीत, प्लास्टिकचा वापर कमी करताय, फटाके फोडण्याचं व होळीला कृत्रिम रंग खेळण्याचंही प्रमाण हळूहळू तुम्ही कमी करताय. त्यातून तुम्ही पर्यावरणाची सोबतच निसर्गाची काळजी घेतात, हे पाहून आणि तुमचा खारीच्या वाट्याचा सहभाग पाहून तुमच्या रुपात एक आशेचा किरण आम्हाला सतत दिसत राहतो!

तर मंडळी, नुकतीच भली मोठ्ठी सुट्टी संपवून तुम्ही सगळेजण शाळेला हजर झाले असणार. आम्हाला खात्री आहे की या सुट्टीत तुम्ही भरपूर धम्माल केली असेल, तुमच्यातील काही जण मामा-मावशीच्या गावाला गेले असाल, काहींनी शेतात मस्ती केली असेल, तर काही जण कुटुंबासोबत फिरायलाही गेले असतील.

सुट्टी असुनही शक्य होते त्याठिकाणी कुमार निर्माणचे संघ व बैठका हे नियमित सुरु होते. सुट्टी म्हटल्यावर मज्जा ही करायलाच हवी. पण त्यासोबतच इतरही काही चांगली कामं करायला हवीत. त्यासाठी आम्ही तुम्हाला ‘उन्हाळ्याच्या सुट्टीतले कृतिकार्यक्रम’ याविषयीचे खाद्य पुरवले होते. त्यात परिसरातील काहींच्या मुलाखती, सेवा देणारे-घेणारे, लहानांसाठी शिबीर असे काही कृतिकार्यक्रम सुचवले होते. यातील बरेच कृतिकार्यक्रम काही संघांनी अतिशय उत्तमरित्या केले. आम्हाला खात्री आहे की हे कृतिकार्यक्रम करताना तुम्हाला मज्जा नक्कीच आली असेल परंतु सोबतच काही चांगले वाईट अनुभवही आले असतील. तर नेहमीप्रमाणे तुम्हाला आलेले अनुभव आम्हाला पाठवण्यास विसरू नका. तसेच तुमच्यापैकी काहींनी आपापल्या ठिकाणी वैयक्तिक कृती केल्या असतील तर तेही आम्हाला नक्की पाठवा.

सुट्टीमुळे काही संघ विस्कळीत झाले असण्याची शक्यता आहे पण आता शाळा सुरु झाली की संघही नियमित सुरु होतील. काहींच्या संघात नवीन मुलेही येतील तर त्यांना कुमार निर्माण समजावून सांगणे आणि आपल्या संघात सामावून घेणे हे आता तुमचे कर्तव्य आहे.

मित्रांनो, या भरारीत तुमच्याशी एक महत्त्वाची गोष्ट शेअर करायची आहे, ते म्हणजे मुलांनीच मुलांसाठी आयोजित करायचे ‘मुलांचे गेटटूगेदर’! आता यात ‘मुलांचे’ असं जरी म्हटलं असेल तरी त्यात मुलीही आहेत बरं का! तर या गेटटूगेदर विषयी अधिक माहिती या भरारीत दिलेली आहे, ती नक्की आणि न विसरता वाचा. आम्हाला खात्री आहे की तुम्हाला ही गेटटूगेदरची कल्पना नक्कीच आवडेल!

तुम्हाला माहितीये? नुकतीच निमंत्रकांची म्हणजेच तुमचा संघ सांभाळणारे ताई-दादा, सर-मॅडम यांची ‘द्वितीय निमंत्रक प्रशिक्षण कार्यशाळा’ जळगाव व पुणे येथे पार पडली. या दोन दिवसांत वेगवेगळे सत्रं होते, सोबतच आम्ही खुप गाणी म्हटली, खेळ खेळलो, सिनेमा पहिला, खुप मज्जा केली. यात विशेष सांगायचं म्हणजे सर्व निमंत्रकांनी गेल्या ५ महिन्यांचा आपापल्या संघाचा प्रवास सगळ्यांसोबत शेअर केला. ते ऐकताना आम्हाला जाणवलं की तुमचे संघ, बैठका तसेच कृतिकार्यक्रम अतिशय उत्साहात सुरु आहेत.

आता लवकरच आपल्या सर्वांचा आवडता ऋतू म्हणजेच पावसाळा येईल आणि ही उन्हाळ्याची रखरख कुठल्या कुठे पळून जाईल. गेटटूगेदर विषयी वाचून आम्हाला लवकरात लवकर कळवा म्हणजे मी आणि शैलेश त्याप्रमाणे तुम्हा सर्वांना भेटायला येऊ आणि नेहमीप्रमणे खुप धम्माल करू!

तर, येत्या पावसात सर्वांनी मनसोक्त भिजा आणि सोबत तब्येतीची काळजीही घ्या!

लवकरच भेटुया!

तुमचे

प्रणाली, शैलेश

संवादाकीय

संवादकीय

हेल्लो मित्रांनो...

कसे आहात? सर्व मजेत ना?

आम्हीही इकडे मजेत आहोत.

नवीन वर्षाचे हे पहिले ‘भरारी’! त्यामुळे उशिराने का होईना तुम्हा सर्वांना आमच्याकडून नवीन वर्षाच्या खुप खुप शुभेच्छा! सोबतच होळीच्याही शुभेच्छा!

नुकताच आपण कुमार निर्माणच्या ५व्या सत्रात प्रवेश केला आहे. मागील सत्रात तुम्ही सर्वांनीच आपापल्या ठिकाणी उल्लेखनीय काम केल्याबद्दल तुमचे विशेष कौतुक आणि या सत्रात तुम्हा जुन्या मित्रांचे प्रेमपूर्वक स्वागत! तुमच्यासोबत या सत्रात काही नवीन मित्रही जोडल्या गेले आहेत. या नवीन मित्रांचेही कुमार निर्माण मध्ये मनःपूर्वक स्वागत!

नुकत्याच कुमार निर्माणच्या पाचव्या सत्राच्या ‘निमंत्रक प्रशिक्षण कार्यशाळा’ जळगाव व पुणे येथे संपन्न झाल्या. यावर्षी महाराष्ट्रभरातून साधारण ९५ संघांची नोंदणी झालेली आहे. या कार्यशाळांत आम्ही ‘कुमार निर्माण’ समजून घेतले, वेगवेगळ्या विषयांवर चर्चा केली, तुम्ही केलेले कृतिकार्यक्रम तुमच्याच निमंत्रकांकडून शेकोटीसमोर बसून ऐकले, छोटे सिनेमेही पहिले. सोबतच खुप खेळलो, गाणी म्हटली आणि भरपूर मज्जा केली!

तुम्ही केलेले कृतिकार्यक्रम तुमच्या निमंत्रकांच्या तोंडून ऐकताना आम्हाला खुप आनंद झाला. तुम्ही करत असलेले कृतिकार्यक्रम आणि त्यातून तुम्हाला मिळणारा आनंद ही कुमार निर्माणच्या पाठीवर मिळालेली एक कौतुकाची थापच आहे!

तुमच्या बैठका सुरळीत चालल्या असतील याची आम्हाला खात्री आहे. काही संघांत यावर्षी नवीन मित्रही जोडल्या गेले असतील. त्यांना संघातील जुन्या मुला-मुलींनी कुमार निर्माण समजावून सांगणे आणि संघाचा भाग करून घेणे गरजेचे आहे.

सोबतच काही ठिकाणी नवीन संघांची स्थापना झाली असेल. नवीन मुलांना ‘कुमार निर्माण म्हणजे काय बरं असेल?, त्यात आपण काय करणार?’ असे एक ना अनेक प्रश्नही पडले असतील. तर मित्रांनो, तुमच्या निमंत्रकांच्या मदतीने आणि काही आमच्या मदतीने तुम्हाला हळूहळू सगळं समजेल पण सध्यासाठी एक मात्र पक्कं लक्षात ठेवा की ‘कुमार निर्माण मध्ये तुम्ही खुप खेळणार आहात, फिरायला जाणार आहात, नवीन मित्र-मैत्रिणी जोडणार आहात, अनेक विषयांवर चर्चा करणार आहात आणि तुमच्या कृतीने तुमचा परिसर आहे त्यापेक्षा अजून सुंदर बनवणार आहात.’ थोडक्यात काय तर इथून पुढे वर्षभर आपण सर्व मिळून खुप मजा-मस्ती करणार आहोत!

आतापर्यंत स्वतःच्या नवीन संघाला तुम्ही छानसे नावही ठेवले असेल, संघातील कुणाचीतरी संघप्रमुख म्हणून नेमणूक झाली असेल आणि तुमच्या बैठकाही सुरु झाल्या असतील किंबहुना सुरुवात जोरदारच झाली आहे हे आम्हाला तुमच्या निमंत्रकांकडून कळलेले आहेच.

तुमचा उत्साह पुढेही असाच टिकून राहावा म्हणून आम्ही दर २ महिन्यांनी तुम्हाला हे ‘भरारी’ पाठवत राहू, जेणेकरून तुम्हाला इतर संघांत काय सुरु आहे हेही कळेल.  त्या माध्यमाने तुमच्याशी संपर्कात राहू, अधून-मधुन आम्ही तुम्हाला भेटायलाही येऊ. तुम्हाला ‘कुमार निर्माण’ सबंधित काहीही मदत लागल्यास आम्हाला नक्की फोन करा. आमचे संपर्क क्रमांक पहिल्या पानावर आहेतच आणि हो, बरेच दिवस झाले आपण भेटलो नाही तर लवकरच आम्ही तुम्हा सर्वांना भेटायला येतोय. सोबतच आम्हाला आपल्या नवीन मित्रांनाही भेटण्याची उत्सुकता लागली आहे.  तेव्हा लवकरच भेटु, खुप-खुप खेळू आणि मज्जा करू!

तोपर्यंत तुमच्या पुढील प्रवासास खुप साऱ्या शुभेच्छा!