कुमार गीत — आम्ही प्रकाशबीजे

आम्ही प्रकाशबीजे रुजवीत चाललो

वाटा नव्या युगाच्या रूळवित चाललो II धृ II

काट्यावरून जाता मागे न पाय घेऊ

हसऱ्या कळ्याफुलांची स्वप्ने विणून घेऊ

ओसाड माळ आम्ही फुलवीत चाललो

वाटा नव्या युगाच्या रूळवित चाललो. आम्ही प्रकाशबीजे...II १ II

आमुची सुखे निराळी विश्वात बिंबलेली

दुःखात निर्मितीची स्फूर्ती उफाळलेली

आमुचे भविष्य आम्ही घडवीत चाललो

वाटा नव्या युगाच्या रूळवित चाललो. आम्ही प्रकाशबीजे...II २ II

आले अपयश घाले पाया नव्या यशाचा

इतिहास साक्ष आहे आमुच्या पराक्रमाचा

प्रासाद सज्जनांचे सजवीत चाललो

वाटा नव्या युगाच्या रूळवित चाललो. आम्ही प्रकाशबीजे...II ३ II

बदलार्थ वेचिती जे सर्वस्वही स्वतःचे

ते शिल्पकार सारे येत्या नव्या युगाचे

त्यांची स्मृती मनाशी जागवीत चाललो

वाटा नव्या युगाच्या रूळवित चाललो

आम्ही प्रकाशबीजे रुजवीत चाललो. आम्ही प्रकाशबीजे...II ४ II

कुमार गीत

कुमार गीत

तनमनाच्या मंदिरी या जागवूया चेतना

अर्थ लाभो जीवनाला हीच आमुची प्रार्थना II धृ II

चेतना माझ्यातही, याच्यातही, त्याच्यातही

पृथ्वी-जल-आकाश अन वायुतही, तेजातही

विश्वव्यापी या स्वरूपा नित्य माझी वंदना II १ II

एक आहे मागणे, हातात या सामर्थ्य येवो

भिक-लाचारी-दयेचा स्पर्श ना आम्हांस होवो

कष्ट करू आयुष्य फुलवू मंत्र जप रे तू मना II २ II

घेतले व्रत आज आम्ही स्वप्न ते सत्यात येवो

दीन-दुर्बल-वंचितांचा विसर ना आम्हास होवो

या जगी आनंद नांदो ही मनाची कामना II ३ II

तनमनाच्या मंदिरी या जागवूया चेतना

अर्थ लाभो जीवनाला हीच आमुची प्रार्थना II धृ II

गीत – पवन खेबुडकर

संगीत – अशोक पत्की

स्वर – शौनक अभिषेकी

चित्रपट – आम्ही असू लाडके

https://www.youtube.com/watch?v=HPGwkU_rTT4

वरील लिंक वर जाऊन तुम्ही या गाण्याचा विडीयो बघू शकता किंवा खालील QR कोड स्कॅन करा

कुमार गीत

कुमार गीत

प्रश्न विचारा पुन्हा पुन्हा

असेच का अन तसेच का?

शिकणे कधी संपत नाही

होऊ द्या लाख चुका

प्रश्न विचारा... II धृ II

कुत्र्याची शेपूट वाकडी का?

पेंग्विनची मान तोकडी का?

क्रिकेटची बॅट लाकडी का?

सापाची चाल वेडीवाकडी का?

प्रश्न विचारा... II १ II

वटवाघूळ रात्री फिरतात का?

मासे पाण्यात तरतात का?

पतंग दिव्यावर मरतात का?

काजवे चमचम करतात का?

प्रश्न विचारा... II २ II

खोकल्याची उबळ येते का?

सर्दीत नाक गळते का?

मेंदूला वास कळतो का?

आठवणीने उचकी लागते का?

प्रश्न विचारा... II ३ II

रंगीत तारे असतात का?

दिवसा तारे दिसतात का?

जीवसृष्टी कुठे असेल का?

माणसासारखा माणूस दिसेल का?

प्रश्न विचारा... II ४ II

प्रश्न विचारा पुन्हा पुन्हा

असेच का अन तसेच का?

शिकणे कधी संपत नाही

होऊ द्या लाख चुका

प्रश्न विचारा... II धृ II

कुमार गीत

डोळे उघडून बघा गड्यांनो झापड लावू नका
जे दिसते ते असेच का हे उलगडण्याला शिका ॥धृ.॥

भवतालीचे विश्व कोणत्या सूत्राने चाले
कोण बोलतो राजा आणिक कुठले दळ हाले
प्रारंभी जे अदभूत वाटे गहन, भितीदायी
त्या विश्वाचा स्वभाव कळता भय उरले नाही
या दुनियेचे मर्म न कळता जगणे केवळ फुका!
जे दिसते ते असेच का हे उलगडण्याला शिका || १ ||

वाहून गेलेल्या पाण्याचा ढग बनतो तो कसा
बीज पेरता कसे उगवते, पाऊस येई कसा
चारा चरूनी शेण होतसे, शेणाचे खत पिका
पीक पेरता फिरूनी चारा, चक्र कसे हे शिका
जीवचक्र हे फिरे निरंतर इतुके विसरू नका
जे दिसते ते असेच का हे उलगडण्याला शिका || २ ||

अणुरेणूंची अगाध दुनिया दृष्टीच्या पार
सूक्ष्मजीव अदृश्य किरणही भवती फिरणार
या सर्वांच्या आरपार जी मुक्तपणे विहरे
बुद्धि मानवी स्थिरचर सारे विश्व वेधुनी उरे
विज्ञानाची दृष्टी वापरा, स्पर्धेमध्ये टीका !
जे दिसते ते असेच का हे उलगडण्याला शिका || ३ ||

स्त्रोत : मराठी विज्ञान परिषद पुणे विभाग

कुमार गीत

माणसा तुझे मी इथे गीत गावे

असे गीत गावे तुझे हित व्हावे IIधृII

असे गोड नाते तुझ्याशी जडावे

तुझ्या संकटाशी इथे मी लढावे II१II

तुझ्या भुकेचे कोडे उलगडावे

तुझे दुःख सारे गळुनी पडावे II२II

एकाने हसावे लाखाने रडावे

असे विश्व आता इथे न उरावे II३II

इथे सारे सारे नवे पेरताना

वामनापरी मी तुझे हात व्हावे II४II

माणसा तुझे मी इथे गीत गावे

असे गीत गावे तुझे हित व्हावे...